.GIF)
شوفي يا قمر موضوع اختيار فستان الخطوبة موضوع في
منتهى السهولة جدا جدا جدا؛ ومش محتاج منك غير إنك تجيبي ورقة وقلم وتحددي
شوية النقاط البسيطة دي، وفي ضوئها تبدئي إنك تختاري الفستان...
-1-
ميعاد الحفل
أول حاجة لازم تفكري فيها هي ميعاد حفلة الخطوبة، وفي النقطة دي
بالذات عايزاكِ تكوني واعية وتحددي ميعاد حفل خطوبتك بعد شهر أو شهر ونص،
وده علشان يكون عندك وقت كافي جدا إنك تلاقي الفستان اللي بتحلمي بيه..
طبعا إنتِ مستغربة من كلمة شهر وبتقولي إن شهر كتير أوي ده أنا ممكن أجيب فستان الخطوبة في يومين...
هقول لك عندك حق فعلاً، ممكن إنك تلاقي الفستان في يومين فعلا، بس في
احتمال تاني وهو إنك ممكن تلاقي فستان حلو بس محتاج إنك تضيفي عليه
تعديلات علشان يناسبك، زي مثلا إنك تقفّليه من فوق شوية، أو إنك توسعيه أو
تضيّقيه شوية علشان يناسب طبيعية جسمك، وفي الوقت ده إنت فعلا محتاجة وقت
كافي علشان تستلمي الفستان بالشكل اللي إنت عايزاه.
وبكده من الأحسن إن يكون عندك وقتك الكافي اللي تعملي فيه كل حاجة إنتِ عايزاها، بدل ما تحتاري!!
-2-
امكانياتك
مش عيب أبداً إنك تحطي ميزانية محددة لفستان خطوبتك، وعلى أساس
الميزانية دي تبدئي تحددي، إذا كنت هتشتري الفستان يبقى هتشوفي هتشتريه في
حدود كام بالضبط، أو إذا كنت هتأجريه يبقى هتأجريه في حدود كام برضه.
واوعي تفكري أبداً إنك علشان تجيبي فستان شيك يبقى لازم يكون غالي؛
لإنك ممكن تجيبي فستان في منتهى الشياكة والبساطة وفي نفس الوقت ثمنه
مناسب جدا.
ونصيحة مني ليك بلاش تحطي ثمن غالي أوي لفستان الخطوبة؛ لأن خير الأمور الوسط وخصوصا إنك بتلبسيه مرة واحدة فقط لمدة ساعتين.
-3-
مكان حفلة الخطوبة
مكان الحفل من الحاجات المهمة اللي لازم تكوني
حطاها في اعتبارك وإنت بتختاري فستان الخطوبة، وده لإن المكان هيفرض عليكِ
شكل معين للفستان فمثلاً..
لو كانت الخطوبة في قاعة كبيرة... يبقى هتقدري إنك تختاري أي شكل إنتِ عايزاه، ويُفضل طبعاً إنك تختاري فستان منفوش علشان يناسب طبيعة المكان..
لكن لو كانت الخطوبة في البيت أو في قاعة صغيرة... يبقى
حاولي على قد ما تقدري إنك تختاري فستان بسيط جدا، وقصدي بكلمة بسيط هنا
يعني يكون ما فيهوش تطريز كتير وكمان تكون القصة بسيطة جدا..
-4-
لون الفستان اللي يناسبك
في أكتر من نقطة لازم تكوني حطاها في اعتبارك وإنت بتختاري لون فستانك وهي:
1. لون بشرتك... وأحسن طريقة تقدري
بيها إنك تختاري اللون المناسب للون بشرتك، هي إنك تقيسي الفستان وتقفي
قدام المرآة، وتشوفي إذا كان اللون لايق عليكِ وعلى لون بشرتك ولا لأ؟!
2. طبيعة شخصيتك... عادة البنت
الجريئة بتختار الألوان الجامدة الصريحة زي الأحمر أو الأخضر الزراعي، أما
البنت الهادية عادة ما بتميل إلى الألوان الهادية زي الروز الفاتح بدرجاته
المختلفة أو اللبني أو البيستاج.
3. طبيعة جسمك... كمان طبيعية جسمك
من الحاجات اللي لازم تكوني حطاها في اعتبارك وإنت بتختاري لون الفستان،
فمثلا لو كان جسمك مليان يبقى عليكِ وعلى الألوان الغامقة زي مثلاً الموف
أو النبيتي أو الأحمر الغامق وابعدي نهائي عن الألوان الفاتحة؛ لأنها
هتظهرك بشكل أكبر مما أنت عليه، أما لو كان جسمك رفيع يبقى عليكِ وعلى
الألوان الفاتحة زي البيستاج أو الروز، أما لو كان جسمك متناسق هتلاقي
عندك حرية في اختيار أي لون سواء فاتح أو غامق.
-5-
بصي على أكتر من محل
وعلى أكتر من موديل
بعد ما تحددي ميعاد خطوبتك ابدئي على طول في النزول للمحلات، ويا ريت
إنك تبصي على أكتر من محل من محلات السواريهات سواء كانت اللي بتبيع
الفساتين أو بتأجرهم على حسب ما إنت عايزة...
وفي كل محل قيسي أكتر من موديل، علشان تقدري إنك تحددي الشكل المناسب واللون المناسبين لك...
وإنتِ بتلفّي على أكتر من محل حطي عينيك على أكتر من فستان، وليكن مثلا
ثلاثة أو أربعة فساتين، وفي النهاية اعملي عملية تصفية واختاري فستان واحد
منهم، وروحي على المحل وقسيه تاني، يُفضل دايماً إن يكون معاكِ اثنين من
أصحابك المقربين اللي بتثقي في ذوقهم أو والدتك وأختك مثلا، علشان يفيدوكِ
ويقولوا لك شكل الفستان عليكِ عامل إيه؟!
ونصيحة مني بلاش تأخدي معاكِ أكتر من اثنين وأنت رايحة، علشان مش كل واحد يقول لك كلمة تخليكِ ما تقدّريش تاخدي قرار.
-6-
لما يعجبك الفستان اسألي
والنقطة دي مرتبطة بالنقطة السابقة، وهي وإنت بتقيسي أي فستان ويعجبك
تبدئي في توجيه بعضا من الأسئلة لصاحبة المحل والأسئلة دي هتتضمن؛ السؤال
عن السعر؟! وآخر ثمن ممكن يوصل له الفستان؟! وده كله طبعا علشان تعرفي إذا
كان الفستان مناسب للميزانية اللي إنت حطاها ولا لأ؟!
كمان اسألي عن إمكانية تقفيل الفستان خاصة لو كنتِ محجبة، والشكل اللي
هيتقفل بيه هيكون عامل إزاي؟! ويا ريت إنك تشوفي موديل زيه يكون متقفّل
علشان تقدري إنك تستوعبي شكله بالضبط.
أحياناً كتيرة الفستان يعجبك لكن مقاسه بيكون صغيرا، في الحالة دي
اسألي صاحب المحل عن إمكانية عمل موديل زيه بالضبط بس بالمقاس المناسب
لك!!!
حددي ميعاد الاستلام
بعد الاتفاق على فستان معين، اتفقي مع صاحب المحل على ميعاد استلام
الفستان، ويا ريت إن الميعاد ده يكون قبل ميعاد الحفل بعشرة أيام، وده
طبعا علشان لو لقيتي أي مشاكل في الفستان تقدري إنك تحلّيها.
ودلوقت دوسي على الصورة دي
علشان تتفرجي على تشكيلة متنوعة
من فساتين الخطوبة
هدية من "بص وطل"
لكل عرائس"بص وطل"
وقبل ما أقول سلام
أحب ألفت نظرك لنقطة مهمة جدا
وهي...
إن الموديلات اللي بنعرضها دي ما هي إلا تصميمات إحنا جبناها علشان تساعدك، إنك تعرفي آخر خطوط الموضة، وده مش معناه إنك تنفّذيها زي ما هي بالحرف، ولكن إنك تستوحي منها أفكار تناسبك، يعني إذا عجبك موديل ممكن تشوفي خيّاطة كويسة تدخل التعديلات اللي أنت عايزاها.. يعني مثلاً لو من غير كم زي اللي موجود في الصور ممكن إنها تصمم لكِ نفس الموديل بس بكم طويل.. يعني من الآخر كده أي موديل يعجبك ممكن يتقفّل بحيث إنه يناسب البنت المحجبة وكمان اللي مش محجبة.. |
وبكده أكون قدّمت لكم
مجموعة من النصائح والتصميمات
اللي تساعدكم على اختيار الفستان
ولو عجبتكم الموديلات اللي جبناها ابعتوا وقولوا
ولو مش عاجباكم برضه ابعتوا وقولوا
