.GIF)
معلش اتاخرت عليكم لان كنت مسافر ولسة راجع البارحة
في البداية أحب أوجه التهنئة لكل إخواننا المسيحيين بمناسبة بداية الصوم... وعلشان كده هانتهز المناسبة دي وأقدم النهارده مجموعة من الأكلات الصيامي وعلى فكرة الاكلات دي مناسبة كمان للناس اللي عايزة أكل فيه نسبة قليلة من الدهون...
الأرز بالخضروات
المقادير:
• 1/2 كوب زيت ذرة.
• 2 عود كرفس مقطع قطع صغيرة.
• كوب عيش غراب مقطع قطع صغيرة.
• 3 ثمرات كوسة مقطعة قطع صغيرة.
• كوب بسلة مسلوقة.
• 2 فص ثوم مفروم.
• 3 ثمارات طماطم منزوعة القشر ومقطعة قطع صغيرة.
• 3 ملاعق كبيرة خل.
• 2 معلقة كبيرة عصير برتقال.
• ثمرة كنتلوب مقطعة مكعبات صغيرة.
• 4 قطع خرشوف مقطعة قطع صغيرة.
• 2 كوب أرز مسلوق "يفضل أنه يكون من الأرز ذو الحبة الطويلة".
• 1ثمرة جزر مبشورة.
• 8 حبات زيتون أسود منزوع النوى ومقطع قطع صغيرة.
• أوراق بقدونس للتزيين.
الطريقة:
1- هنحط صينية كبيرة على النار ونسخن فيها الزيت وبعد كده نشوح الكرفس وعيش الغراب والبسلة والثوم في الزيت لمدة خمس دقائق بس ناخد بالنا إن النار تكون هادية.
2- بعد مرور الخمس دقائق نضيف اليهم باقي المكونات ونسيبهم على النار لمدة عشرة دقائق مع التقليب المستمر.
3- هنشيلهم من على النار ونحطهم في طبق التقديم ونزين الطبق بأوراق البقدونس.
وبألف هنا وشفا
بيتزا صيامي
مقادير عجينة البيتزا:
• 3 أكواب دقيق.
• 2 ملعقة خميرة بيرة.
• 1/2 ملعقة صغيرة ملح.
• كوب ماء دافئ.
• 3 معالق كبيرة زيت ذرة.
طريقة عمل عجينة البيتزا:
1- هنخلط كوب ونصف الدقيق مع الخميرة والملح وبعد كده نضيف المية والزيت، ونضربهم كلهم بمضرب البيض الكهربائي على سرعة عالية لمدة 3 دقائق.
2- هنضيف باقي الدقيق إلى الخليط السابق ونقلبه باستخدام ملعقة خشبية.
3- هننقل العجينة على رخامة المطبخ أو على لوح خشبي وهنبدأ في عجنها بإيدينا لغاية ما نلاقيها بقت طرية ومطاطة وسهلة التشكيل على شكل دوائر كبيرة.
4- هننقل العجينة إلى الطبق البلاستيك أو طبق زجاجي كبير وندهنها بالزيت ونغطيها بقطعة قماش ونسيبها في مكان دافي لمدة ساعتين علشان تخمر وحجمها يزيد...
مقادير باقي مكونات البيتزا:
• عجينة بيتزا.
• 1 حبة فلفل أخضر مقطعة مكعبات أو عيدان.
• 1/2 كوب صلصة بيتزا أو "معجون طماطم"
• 2 حبة طماطم مقطعة قطع صغيرة أو حلقات.
• بصلة متوسطة الحجم مقطعة حلقات.
• 1 كوب عيش الغراب مقطع شرائح.
• 2 فص ثوم مفروم.
• 1 ملعقة صغيرة زعتر.
• 1/2 ملعقة صغيرة فلفل أسود.
• عرقان من الكرفس مقطعان قطع صغيرة.
• زيتون أسود مقطع دوائر.
الطريقة:
1- هنقطع عجينة البيتزا إلى قطع صغيرة مدوّرة ونحطها على رخامة المطبخ أو على سطح خشبي مرشوش بالدقيق وهنبدأ في فردها علشان تغطي صاج أو صينية البيتزا وبعد كده نحطها في الصينية بس ناخد بالنا إننا قبل ما نحطها ندهن الصينية بالزيت.
2- هنضيف صلصلة البيتزا فوق العجينة ونرش الثوم المفروم ونضيف الفلفل الأخضر والطماطم والبصل والكرفس والزيتون الأسود وعيش الغراب ونرش الفلفل الأسود ونقطع البيتزا على شكل مثلثات.
3- هنسخن الفرن على درجة حرارة "220 - 200 ْ مئوية" بعد كده ندخل الصينية في الفرن لمدة 15 دقيقة وبعد ما نلاقي وشها احمرّ نخرجها..
وبألف هنا وشفا
مكرونة بالبشاميل صيامي
المقادير:
• كيلو مكرونة أقلام.
• كيلو مشروم.
• 3 بصلات.
• نصف كوب دقيق.
• 1/4 كوب زيت.
• كوب ماء.
• ملح وفلفل وتوابل.
الطريقة:
1- هنسلق المكرونة وأثناء ما المكرونة بتتسلق هنقطع البصل والمشروم قطع صغيرة ونحمر البصل والمشروم مع بعض في الزيت.
2- هنجيب صينية ونسخن فيها الزيت على النار وبعد كده نضيف إليه الدقيق ونقلبه لغاية لونه ما يبقى دهبي ونضيف إليه المية بالتدريج مع التقليب المستمر وبعد كده نضيف الملح والتوابل.
3- هنجيب صينية فرن وندهنها بالزيت ونرص فيها المكرونة ومن فوقها البشاميل والبصل والمشروم وبعد كده نحط طبقة تانية من المكرونة ومن فوقها طبقة أخرى من البشاميل وندخلها في فرن متوسط الحرارة لمدة نص ساعة أو لغاية ما وشها يحمر نطلعها ونقطعها.
وبألف هنا وشفا
جلاش بالمشروم والبطاطس
المقادير:
• لفة جلاش.
• نصف كيلو بطاطس.
• ربع كيلو مشروم.
• بصلة.
• ملح و فلفل.
• زيت.
الطريقة:
1- هنقطع المشروم والبصل إلى قطع صغيرة ونحمرهم في الزيت.
2- هنسلق البطاطس وبعد كده نهرسها ونضيف إليها البصل والمشروم الملح والفلفل ونقلبهم كلهم مع بعض.
3- هنقطع لفة الجلاش إلى ثلاث شرائح طولية ونحشي شرائح الجلاش بالخليط السابق ونلفها على شكل مثلث ونرصها في صينية فرن مدهونة بالزيت وندهن وجه الجلاش بالزيت وندخلها الفرن لغاية ما وشها يحمر نطلعها ونرصها في طبق التقديم.
