الاحتفال "بعيد الحب"على طريقة نجوم العرب

بكره كلنا هنحتفل بعيد الحب كل سنة وأنتم طيبين طبعا فيه ناس كتير بتحتفل باليوم ده وهما مش عارفين إن السبب في الاحتفال باليوم ده هو الراحل "مصطفى أمين" وكان الهدف منه هو إعادة مشاعر الحب والود بين الناس...
وإحنا في مصر بنحتفل بالحب مرتين في السنة: المرة الأولى بتكون في بداية العام يوم 14/ 2 وده بيكون اليوم العالمي للاحتفال بالحب يوم الفالنتاين... واليوم التاني يوم 4/ 11 وده بيكون في مصر بس...
وعلى فكرة العيد ده مش بس بتاع "الحبّيبة" أو "الأزواج" فقط زي ما كتير من الناس فاهمين؛ لأن ممكن الأصدقاء أو الإخوات أو الزملاء أو الجيران يتبادلون التهاني أو الأكلات الحلوة في اليوم ده كتعبير عن مشاعر الحب والود بينهم وبين بعض..
واتخيلوا معايا كده لو اتنين متخانقين مع بعض خناقة جامدة قوي وجه واحد فيهم في اليوم ده وجاب للتاني هدية بسيطة وقال له: كل سنة وأنت طيب أكيد الخناقة دي مش هيكون لها أي أثر بعد كده..
قبل ما أتكلم عن الهدايا اللي ممكن إننا نهادي بيها بعض في اليوم ده عايزين نتفق إن الهدية عمرها ما كانت بتمنها يعني وردة بلدي بـ2 جنيه ممكن تكون قيمتها وتعبيرها عن أحاسيسنا أكبر بكتير من أسورة ذهب بـ 2000 جنيه بنقدمها واحنا مش حاسّين بأي حاجة أو مش هتقدر توصّل اللي عايزين نقوله...
ومن الهدايا البسيطة اللي ممكن إننا نقدمها في يوم زي ده:

من أكتر الحاجات اللي الناس بتحب إنها تجيبها في أي مناسبة خاصة في عيد الحب هي الدباديب واللي بيتراوح سعرها ما بين 5 جنيه لـ1000 جنيه!!!
بس على العموم لو كنا من الناس اللي بتحب الدباديب يبقى يا ريت إننا نشتري الدباديب الماركات الكويسة المتوسطة السعر لأن الأنواع الرخيصة من الدباديب بتكون رديئة جدا ومش كويسة والأنواع الغالية دي أنا باعتبرها فلوس رايحة على الارض...

من الهداية اللي ممكن أننا نجيبها وتكون فعلا هدية ليها قيمتها هي "الميدالية الفضة" ويا سلام لو حفرنا على الميدالية دي أي كلمة حلوة للشخص اللي إحنا هنديله الهدية دي أكيد هتبقى أحلى وأحلى..
وفيه كمان الميداليات الكريستال اللي على قد ما تمنها بيكون غالي شوية إلا إنها ليها قيمتها..

فيه محافظ جلد كتير موجودة شكلها في منتهى الشياكة وتمنها كمان مناسب لكل الناس إنها تشتريه ممكن إننا نجيبها ونحفر عليها اسم اللي إحنا هنديه الهدية...
من الهدايا البسيطة اللي ممكن إننا نجيبها هي إننا نجيب مخدة قطيفة مكتوب عليها أي كلمة حلوة زي "I love you" ونقدمها كهدية...
وفيه هدايا حلوة قوي تانية ممكن نجيبها في عيد الحب زي زرعة تعيش جوه البيت ونعتني بيها زي زرعة "البامبو"..
أما الناس اللي بيحبوا الحيوانات فممكن الهدية تكون قفص عصافير وخصوصاً (Love Birds ) أو حوض سمك ومش لازم يكون حوض كبير ممكن يكون حوض مدور صغير فيه سمكة واحدة بس ونوع السمك اللي بيعيش في الأحواض الصغيرة دي الـ“fantail or fighter”.
لو لنا حد مسافر برّه ونفسنا نقول له: كل عيد حب وأنت طيب ومش عارفين ازاي فممكن إننا نبعت له ميل فيه صورة حلوة إحنا نختارها أو كارت معادية ونقول له: كل سنة وأنت طيب... أكيد لما يفتح الميل ويشوف الصورة دي هينبسط قوي...