بلح الشام

المقادير :-
•كوباية مية.
•1كوب دقيق أبيض.
•1 معلقة كبيرة زيت أو زبدة.
•3 بيضات.
•ذرة ملح.
•زيت للتحمير.
•شربات.
•فانيليا.

ودي مقادير شربات بلح الشام:
•1/2 كوب سكر.
•3/4 كوب مية.
•عصير ليمونة.
•فانيليا.

طريقة عمل الشربات:
حطي السكر والمية كلهم مع بعض في إناء على نار هادئة لمدة نص ساعة. بعد كده ضيفي الليمون وسيبيه لمدة ربع ساعة أو لغاية ما تلاقي إنه بدأ يتقل شيليه من على النار وضيفي إليه شوية فانيليا وسيبيه لغاية ما يبرد.

الطريقة:
1- هاتي الدقيق وانخليه وبعد كده ضيفي إليه ذرة الملح.

2- بعد كده هاتي صينية وحطي فيها كوباية المية وضيفي إليها معلقة الزيت أو الزبدة وحطيها على النار، ولما تلاقي المية بدأت في الغليان ضيفي إليها الدقيق دفعة واحدة بس خدي بالك إنك تهدي النار وتقلبي بسرعة الخليط ده كله مع بعضه كويس علشان مايتجمعش العجين ويسيب أثر في الصينية.

3- بعد كده شيليه من على النار وسيبيه لغاية ما يبرد، وبعد كده حطي فيه بيضة وضيفي إليها رشة فانيليا وقلبيهم مع بعض كويس، وبعد كده حطي بيضة تانية وقلبيهم كويس، وحطي بيضة تالتة وقلبيهم كويس بعد كده لما تلاقي العجينة لينة.

4- هاتي الصينية اللي هتقلي فيها وحطي فيها كمية كبيرة من الزيت وسخني الزيت، وبعد كده حطي العجينة اللي عندك في كيس فيه بلبلة أو باستخدام ماكينة بلح الشام ولما الزيت يسخن اضغطي على الكيس
علشان تنزل منه عجينة بلح الشام، نزلي من الكيس كل مرة عجينة بلح الشام فيه بطول صوابع إيدك، كرري العملية دي لغاية ما تلاقي العجينة خلصت.

5- سيبي بلح الشام في الزيت لغاية ما تلاقي لونه بقى دهبي بعد كده شيليه من على النار وحطيه في مصفاه علشان يتصفى منه الزيت.

6-سيبي بلح الشام لغاية ما يبرد وبعد ما يبرد حطيه في الشربات وبعد خمس دقائق شيليه وحطيه في مصفاة تانية علشان يتصفى منه الشربات، بعد كده حطيه في طبق التقديم ورشي عليه جوز الهند.

وبالهنا والشفا