.GIF)
تقديم كل جديد هو هدفنا في قمر 14..
مصممة الأزياء الشهيرة "ريهام فاروق" كانت معنا بتصميماتها المتميزة في الشتاء الماضي وها هي تعود بتصميمات صيف ساخن جدا كله "ألوان" و"شياكة" وكمان "حشمة"..
جديد "ريهام فاروق" مفاجأة، نتمنى أن يغتنمها الكل قبل أن ينتهي موسم الصيف القصير جدا هذا العام لدخول شهر رمضان الكريم قبل نهاية الموسم الساخن...
مصممتنا ابتكرت "مايوهات" للمحجبات ولكن بالطبع بدون عيوب ومشاكل مايوهات المحجبات الحالية...
ونسألها:
ما سبب اهتمامك بمايوهات المحجبات؟
الفكرة الأساسية أن المحجبة من حقها تنزل البحر وتتمتع بالصيف زي أي حد ولكن في نفس الوقت تكون محتشمة وكمان أنيقة بمعنى أن المايوهات الموجودة في السوق –ولا ننكر أنها وفرت حلا وسطا يسمح للمحجبة نزول البحر- فيها مشاكل وعيوب كتيرة منها التصاق المايوه في الجسم بعد نزول المية، وأثناء العوم القطعة الخارجية أو "الدرل" بيتملي مية وبينتفخ بشكل سيئ جدا، والسبب في كده إن الخامة المستخدمة في المايوهات الحالية مش خامة المايوه.
وعشان كده كان هدفي السنة دي أقدم مايوه للمحجبات مصنوع من خامة المايوه الأصلية عشان تعوم فيه بحرية وكمان لا يلتصق بجسمها أو يتملي مية، كأنها لابسة مايوه عادي جدا، بس محتشم وشيك جدا.
دي الخامة لكن الشكل؟!
شكله بسيط جدا عبارة عن قطعة واحدة "سلوبيت" يشبه بدله الغطس وعلى الأجناب شرايط أو خياطات على شكل موتيفات وطبعا إيشارب مخصوص مع المايوه، ومعاه جيب قصيرة مثبتة من الداخل بشكل يخليها تحتفظ بشكلها بعد الخروج من المية.. والممتلئة شوية صممت لها قطعة خاصة تتلبس فوق المايوه ولها نفس المواصفات، وكمان تداري امتلاء الجسم عند البطن أو الأرداف أو الصدر.
نرجع لجديد "ريهام فاروق" في ملابس الصيف؟
من الحاجات الجديدة فستان السهرة للمحجبات أو فستان حفلات "الكوكتيل" بلغة مصممي الأزياء بمعنى أن يكون للبنت المحجبة فستان بسيط من الشيفون أو الستان بدون تطريز وغير مبهرج ولا تضطر للبس إيشاربات مبهرجة أو منقوشة.. الفستان ممكن تحضر بيه مناسبات عائلية أو سهرة أو حفلة.
البنات عند أي مناسبة بيختاروا فساتين سواريهات مليانة تطريز وضخمة جدا ولا يمكن الاستفادة منها، بعد كده وبعد ما تتكلف ثمن فستان سواريه تحطه في الدولاب لأنه مش يمكن تخرج بيه في مكان تاني...
وإيه الخط الأساسي لملابس الصباح؟
الموضة السنة دي موضة الستينيات والسبعينيات، وخاصة في الألوان والرسومات المشجر والدواير المتداخلة مع بعض والمربعات والرسمات الكبيرة قوي المطبوعة.
الألوان الموضة: الأورنج، وجلد النمر "التايجر" والفوشيا والبني والأخضر وبيدخل معاهم اللبني والأصفر.
أما التصميم البارز جدا فهو "التايبس" أو الوسط الساقط، وكمان قصة "الأنبير" والجيبات "الإيفازيه" وعلى فكرة القصات مناسبة لأجسامنا جدا، وبتداري العيوب.
وكمان رجعت الفستاين بأشكالها القديمة والكرانيش الروكامة وطبعا البنات ممكن يلبسوها وتحتها بنطلون.
الأكمام الواسعة قوي موضة وعشان المحجبة تقدر تلبس أي شكل من الأكمام يعجبها تلبس (بادي) تحت البلوزة.
والخامات...!
"الجرسية الفسكوز" من الخامات الحلوة جدا عشان الحر، كمان من الأقمشة الموضة جدا الستان والحرير والشيفون المكرمش والشيفون العادي والجرسية الليكرا.
والإكسسوار!!
الإكسسوار الموضة جدا البلاستيك والعاج والكريستال والسلاسل والدواير المفرغة والقطع المعدنية السادة والمشغولة وأي إكسسوار ممكن يضيف شكل متميز للموديل زي الخشب أو الشغل بالخيط.. لكن التطريز خلاص مش موضة زي الصيف الماضي.. الإكسسوار الصيف ده بيعتمد على استخدام القطع الكبيرة.
