المرايات في المنزل مش للديكور وبس

المعلومة اللي كتير منا مش عارفها هي إن المرآة مش للديكور وبس.. وده لأنها لو اتحطت بطريقة صح ممكن إنها تدي إحساس باتساع الأماكن الضيقة.. مش كده وبس دي بتدي إضاءة داخل المنزل..
يا ريت قبل ما نعلق أي مرآة في المنزل نعمل التجربة دي وهي إننا نجيب المرآة ونقوم بتجربة حطها في المكان اللي عايزين إننا نحطها فيه وبعد كده نشوف شكلها من عدة اتجاهات مختلفة هيكون إزاي؟!
لو لقينا إنها بتخدم المكان جمالياً ومش بتعكس أي مناظر غير جميلة لا نريد رؤيتها يبقى نحطها على طول.
يا ريت نبعد تماما عن إننا نحط المرآة في مكان هيكون مقابل لها فيه حائط آخر وده علشان المرآة ماتعكسش العيوب اللي ممكن إنها تكون موجودة في الحائط ده زي العيوب اللي ممكن إنها تكون موجودة في الدهان مثلا.
ماينفعش أبدا إننا نعلق أكتر من مرآة بأحجام وارتفاعات وعروض مختلفة في غرفة وحدة مليانة بالأثاث وده لأن المرايات دي هتعكس كل الأثاث اللي في الغرفة وهتخلينا نحسّ إن الغرفة دي بقت ضيقة ومزدحمة بالأثاث.
لكن لو عايزين إننا نعلق أكتر من مرآة على حائط واحد يبقى ناخد بالنا إن المرايات دي يكون حجمها واحد ويكون شكل الإطار الخاص بيهم مشابه لبعضه ونسيب بين كل مرآة والتانية مسافة مناسبة..
كمان ناخد بالنا إننا لو هنعلق أربع مرايات مثلا جنب بعض إن المسافة بينهم تكون واحدة وإن مساحة الغرفة اللي عندنا تسمح بتعليق العدد ده من المرايات.
لازم ناخد بالنا إن حجم المرآة يكون مناسب لحجم باقي الأثاث؛ لأن مش معقول إننا نعلق مرآة حجمها أكبر من حجم الشباك الموجود في الغرفة أو أكبر من حجم باقي الأثاث الموجود.

لم تعد المرآة تأخذ الشكل التقيلدي المعروف "المرآة التي توضع فوق الكونسول" ولكن بقى لها تصميمات متعددة لتخدم المكان اللي هتتحط فيه.. فيوجد مثلا المرآة التي توضع بطول الحائط في مدخل الشقة كمان ممكن إننا نستخدم المرايات في السقف لزيادة الإضاءة العلوية.
ولم تعد أماكن وضع المرايات مقصورة فقط على "غرفة الأنتريه "و"مدخل الشقة" لأننا ممكن إننا نحط مرايات في "مدخل الشقة" أو "في غرفة النوم" أو "في غرفة الصالون" أو "في المطبخ" أو "في الحمام".
لازم ناخد بالنا إننا لو هنعمل إطار للمرآة إن الإطار ده يكون مناسب لنوع الأثاث الموجود في المنزل فلو عندنا مثلا أثاث خشبي يبقى نعمل إطار خشبي ويكون لونه مناسب للون الأثاث...
لكن لو الأثاث اللي عندنا فيرفورجيه "معدني" يبقى لازم نختار إطار معدني..
وعلى فكرة فيه مرايات من غير إطار وشكلها حلو برضه ومناسبة لجميع أنواع الأثاث...
أنا دايما بافضل إننا نحط المرآة في المنطقة المقابلة للشباك بحيث يتم تركيبها بزاوية قائمة لتزيد من كمية ضوء النهار الداخل للغرفة وتدي إضاءة للغرفة...
كمان ممكن إننا نحط المرآة في مكان يكون المنظر المقابل لها هو نباتات زينة مثلا، أو أحواض زرع، أو سمك، أو تابلوه فيه مناظر طبيعية لأن المناظر اللي زي دي بتدي لمسة ديكور مريحة جدا للعين.