إزاي تستعدي لعمل مقابلة شخصية؟! 2

زي ما مظهرك مهم جدا كمان تصرفاتك أثناء المقابلة الشخصية دي مهمة جدا وهي اللي هتساعد على الحكم عليكي علشان كده هقولك دلوقتي على الحاجات اللي مفروض تاخدي بالك منها أثناء المقابلة دي وهي..

لازم تعملي في حسابك أنك توصلي بدري قبل ميعادك بحاولي ربع ساعة على الأقل لأن ده هيدي انطباع كويس عنك بإنك إنسانة ملتزمة في مواعيدها... لكن ولو حدث أي أمر ما عارض واضطريتي تتأخري يبقى المفروض تعملي تليفون تعتذري فيه وتوضحي سبب التأخير.
اوعي تنسي قبل ما تدخلي تقفلي موبايلك لأن مش من الإتيكيت إن موبايلك يرن أثناء إجراء المقابلة الشخصية.حاولي أن تصرفاتك تخلي اللي قدامك يحس إن عندك ثقة بنفسك ودي هتبان من خلال طريقة جلوسك وكلامك علشان كده عايزاكي أثناء المقابلة تقعدي وتفردي ضهرك وأنت بتتكلمي خلي راسك مرفوعة لفوق وبصي في عين اللي بيكلمك لأن كل التصرفات دي هتخلي اللي قدامك يحس إن عندك ثقة في نفسك..
كمان خلي دايما الابتسامة على وشك وماتحاوليش تبيني إن أعصابك مشدودة وخليكي دايما عندك ثقة في نفسك وفي قدراتك.
خدي بالك إن مش من الإتيكيت إنك تضحكي بصوت عال أثناء المقابلة الشخصية،وإذا حدث أي شيء مضحك يبقى اكتفي فقط بابتسامة خفيفة..
لو كان معاكي لبانة يبقى المفروض ترميها قبل ما تدخلي لأن مش من الإتيكيت إنك تمضغي لبان أثناء المقابلة الشخصية لأنها بتخلي اللي قدامك يشعر إنك مش مهتمة بيه.


يا ريت تجاوبي على كل الأسئلة اللي بتتعرض عليكي بصدق ومن غير كدب لأن لو ظهر إنك كدبتي فده هيدي انطباع سيئ عنك.


لو كان سبق لك واشتغلتي قبل كده في مكان تاني يبقى اتكلمي عن نجاحاتك اللي حققتيها في عملك السابق وإيه اللي كان نفسك تحققيه واوعي تتكلمي عن عملك السابق بطريقة مش كويسة أو إنك تعرضي المساوئ اللي كانت فيه لأن ده هيدي انطباع سيئ عنك بإنك غير كتومة لأسرار عملك.


مش عيب إنك في نهاية المقابلة تسألي عن طبيعية العمل اللي المفروض هتقومي بيه؟!


بس مستنين نعرف منك رأيك إيه
في النصائح اللي قلنا عليها دي؟!