المكياج المناسب للصبح

ضروري قوي في مكياج الصبح إنك ماتكونيش حاسّة إنك حاطّة ميك أب كثير وفيه طبقات كتير على وشك وده بيكون بإن كريم الأساس والبودرة يبقى شوية خفيف والطبقات العالية نخليها لبعد الظهر، لكن لو الصبح، يبقى ممكن نستعمل (كريم الأساس) وتكون الطبقة بتاعته خفيفة على حسب السفنجة اللي إنت هتستعمليها...
• أول شيء هننضف البشرة ونعمل التنضيف للحواجب والوش وكل حاجة علشان نبقى بادئين الميك أب مش محتاجين أي حاجة بعد كده، ومكياجنا النهارده هيكون شوية روز وتركواز لأن ده موضة السنة دي...

• وبعدين نضع كريم الأساس بالسفنجة ولازم تجربيها الأول على إيدك علشان لو كان فاتح شوية ممكن نغمقه.. والصبح كمان أنا بحب (كريم الأساس) الغامق شوية، يعني بلاش إننا نفتح قوي في كريم الأساس علشان كمان ماتحسيش إنه باين قوي وفيه ناس كتير بتستعمل البودرة المضغوطة ودي أنا مابانصحش بيها خالص، أنا بانصح بكريم الأساس لوحده والبودرة لوحدها، احنا دلوقت عملنا فاتح في الأول على منطقة الجبهة.



• وبعدين هنعمل شوية غامق عند منطقة الخدود علشان نحدد شكل الوش.. (كريم الأساس) لازم ييجي على كل الوش، حتى المناطق اللي جوه العين.. بنوزع كريم الأساس وبندي درجة أفتح شوية تحت العين، وأنا بانصح البنت تجيب درجتين درجة فاتحة ودرجة غامقة والبشرة الدهنية تجيب درجة خمرية شوية، والدرجة الثانية اللي هتجيبيها تبقى فاتحة شوية علشان منطقة العين..



نوزع الكريم كويس قوي واللي هتعمل إسبانش تنزل بالكريم شوية لتحت ولجانب الوجه علشان وشها كله يبقى لون واحد.. وبعدين فيه فرق ما بين إذا كنت نازلة الصبح وبعد الظهر وأنا بانصح أي بنت بتعمل مكياج الصبح وهي نازلة الجامعة أو رايحة الشغل تفتح لضوء الشمس شوية لأن إضاءة الشمس الطبيعية غير إضاءة المرايا والنيون وغير الإضاءة الموجودة في البيت...

• بالبدارة بناخد البودرة... والبودرة عندنا نوعين، فيه البودرة المضغوطة والبودرة السائلة وأنا بافضّل استعمال البودرة السائلة لأن بعد ما بنخلّص بنسيّح البودرة على الوش لكن البودرة المضغوطة للوجه اللي فيه عيوب أو حبوب أو عايزة تغمق حتة معينة من عند الخد.



• وبنبتدي نشيل بالفرشة الكبيرة البودرة الزيادة والفرشة دي من الأساسيات اللي احنا هنستعملها ونجيبها معانا في الشنطة وبنستعملها بالطريقة دي لحد ما نشيل البودرة الزيادة الموجودة في الوجه.

• وبعد كده بنحط بودرة تحت العين علشان لو الآي شادو وقع تحت العين، ممكن بعد ما نخلص نشيل البودرة وبتكون مالهاش وجود والآي شادو كمان ماسابش أثر وبعدين نبتدي برسمة العين، وأنا بانصح أي واحدة لسه هتتعلم ترسم عينيها تحط الأول قلم كحل علشان الأول نحدد شكل العين نفسها ونبدأ من داخل العين لخارجها.

• وبعد كده هنحط الآي شادو اللي فوق علشان لازم تحت الحواجب يكون فاتح شوية، ممكن تحطيه بالفرشة أو بإيدك، والصبح بنستعمل حاجة خفيفة شوية علشان كمان مايبانش قوي إننا حاطّين ميك أب كثير...

• بنحط درجة واحدة من الآي شادو وياريت لون الآي شادو اللي هنحطه يكون هو نفس لون الإيشارب أو اللبس لأن ده بيفرق قوي في الشكل وبيظهر جمال العين.. بعد كده بنسيّح البودرة اللي احنا حاطّيناها تحت العين وممكن في اللحظة دي نستعمل بودرة مضغوطة تحت العين ودي بودرة غامقة شوية نحطها تحتها علشان الشكل يبقى طبيعي، وأنا لا أنصح بالألوان الفاتحة الصبح حتى في لون (كريم الأساس)..

بعد كده هنبص على شكل الحواجب. الحواجب ليها فرش كتير ممكن نستعملها، بس أحسن فرشة بتبقى فرشة صغيرة وناشفة شوية..

بنستعمل للحواجب بودرة فاتحة لونها بني زي بتاع الآي شادو، يعني الآي شادو العادي ممكن نحطه للحواجب ونبدأ من أول الحواجب لحد ما ننتهي للآخر وكل ما كان لون الحواجب أفتح شوية كل ما كان أحلى، فمثلاً الموديل اللي معانا النهارده حواجبها سودا فماينفعش أحط لها إسود في الحواجب علشان أولاً الآي شادو الإسود بيدي شوية وحشية للعين وفي نفس الوقت بيدي حدة قوي وإنت ِ باصّة لحد.. وخدي بالك إن الحواجب بتأثر قوي في شكلنا واحنا بنتكلم فكل ما الحواجب كانت بسيطة ومعمولة بالبودرة يبقى شكلها أبسط وأحلى عشان ماتبانش إنها ثقيلة.

• بعد كده نستعمل الماسكرا والماسكرا طبعاً ليها أنواع كثيرة، وده النوع الخاص بالمحترفين واسمها "ديور" ودي بتعمل مظهر جميل للعين وبتدي كثافة وأنا بانصح الناس اللي رموشهم بتبقى نازلة شوية أو تحس إنها نازلة للأمام ومش بتطلع إنهم يجيبوا "تناية" الرموش وهي سهلة في الاستخدام بس تستعمليها قبل الماسكرا. وهنحط طبعاً ماسكرا تحت العين بس ماتبقاش كثيرة علشان زي ما اتفقنا إن ده مكياج صباحي..

• ودي الفرشة اللي احنا قلنا عليها اللي ممكن نسيّح بيها كل الآي شادو اللي احنا مش عايزينه وممكن برضه تعملي كل حاجة بقطن الأذن وكمان ممكن نستعملها في وضع الآي شادو وممكن نصلح بيها الميك أب.



• بعد كده هنيجي لمرحلة (الروجاجو) لازم يكون واخد على روز شوية، أو واخد على بيج.. وإنت بتحطي (الروجاجو) لازم تضحكي علشان نتوء الخدود كلها بتطلع وعند منطقة الأذن كمان وبتاخدي كمان كل الوش معاكِ علشان مايبقاش فيه فرق بين الوش والجبهة.

• وفيه طريقة لذيذة قوي هنستعملها لروج الصبح إن احنا نحط "قلم تحديد الشفايف" على الشفايف كلها.

• بالطريقة دي بنملا الأول اللي جوه وبعدين نحدد بنفس اللون وكمان التحديد مش موضة قوي السنه دي.. أهم شيء نملا لجوه علشان يبقى كله لون واحد وفي نفس الوقت يثبت معاكِ 3، 4 ساعات الصبح.

• بعد كده بنحط عليه ملمع شفايف فاتح، وده على الشفايف كلها وكمان على التحديد اللي احنا عملناه..