كيفية العناية بالبشرة والمكياج

أولاً باشكرك على المقدمة الجميلة ومبسوطة قوي إني جيت هنا وشفت الاستقبال الحلو ده وأتمنى إننا نقدم لكم النهارده حاجات لذيذة وحلوة بحيث إني أديكم كل حاجة أقدر أفيدكم بيها في الميك أب ولفات الطرح وهنعمل مفاجآت كتير وكمان معانا موديل، فإن شاء الله تكون حلقة حلوة...

فعلا أول حاجة لازم نتكلم عنها النهارده هي ازاي البنت تهتم ببشرتها وبنفسها لأن دي أهم حاجة بتسيطر على كل البنات من 15 سنة إلى 30.



وفيه بنات كتير من سن 13 و15 سنة بييجوا السنتر يقولوا عايزين يعملوا ميك أب وعايزين يلبسوا كويس وده مش عيب أبدا إننا نهتم بنفسنا ومش وحش إننا نلبس كويس ،ومش وحش إن يبقى فيه شوية حاجات كل يوم الصبح بنعملها أو كل أسبوع نعملها عند سنتر أو عند كوافير...



وعلى فكرة ممكن تتبعي نظام يومي وأسبوعي وشهري هيريحك من حاجات كتير جداً وهتبقي كمان أخدتِ الثقة في نفسك لأن أهم حاجة في الدنيا إنك تبقي نازلة من البيت وإنتِ مهتمة بنفسك وعارفة إنتِ بتعملي إيه ولابسة كويس وعاملة ميك أب حلو بسيط ومش لازم تحطي ميك أب كتير لأن كل ما الموضوع ما يبقى بسيط كل ما كان جميل بس بتفاصيل مدروسة

ازاي تعرفي نوع بشرتك؟

علشان تعرفي نوع بشرتك إيه يبقى ياريت إنك تعملي الاختبار ده أول ما تصحي الصبح، بس تكوني منظفة بشرتك قبلها بيوم، وبصي لنفسك في المرايا...

• لو بشرتك بتلمع شوية يبقى بشرتك دهنية.
• لو بشرتك فيها حبوب أو شوية مقشرة فبشرتك جافة.
• لو بشرتك عادية خالص مافيهاش أي لمعة أو تقشير يبقى بشرتك عادية.

وطبعا البشرة الدهنية هي من أكتر أنواع البشرة اللي بتكون موجودة في البنات المصريين أو بنات العرب عموماً علشان كده ياريت إن أصحاب البشرة دي يستعملوا الحاجات اللي تنشف الدهون والزيوت من الوجه والحاجات دي بتكون زي "تونيك" بينشف الدهون الموجودة في البشرة.

والتونيك ده بيكون موجود في الصيدلية بتجيبيه وتستعمليه بقطنة تمرريها على وشك علشان تقفلي المسام أول ما تصحي من النوم، بعد ما تغسلي وشك طبعاً"..

ازاي تغسلي وشك

بالنسبة لغسيل الوجة أنا لا أنصح بالصابون لأن الصابون بيكون فيه نسبة من المواد الكيماوية شوية اللي بتضر بشرتك ويطلع فيها حبوب وده من الأسباب الكتير قوي اللي بتخلي البنات تشتكي من موضوع الحبوب اللي بتظهر بشكل مفاجئ في البشرة.




وعلى فكرة مشكلة الحبوب دي مشكلة بتعاني منها بنات كتير قوي وبتخلتف أسبابها من بنت للتانية فممكن تكون الحبوب دي إما نتيجة أكل غلط أو نوم بالميك أب أو بتعملي حاجة في وشك فبيتأثر على طول، علشان كده بانصح أي بنت بشرتها تظهر فيها حبوب إنها تروح على طول لدكتور أمراض جلدية علشان يحدد لها السبب ويقدم لها العلاج المناسب.




تاني حاجة إنتِ المفروض لو بشرتك دهنية تبتدي تستعملي حاجات تخليها على طول جافة، يعني على طول في الشنطة مناديل ورقية أو مناديل مبللة لتنظيف البشرة لأن طبعاً احنا مش هنحط بودرة كتير الصبح فلو مسحتِ بيها وشك أو مسحتِ إيدك فدي بتنظف وتشيل التراب كأنك غسلتِ وشك بالضبط وإنتِ رايحة الجامعة وإنتِ في المصيف وإنتِ في أي مكان، دي بتعمل رد فعل حلو قوي للبشرة...
لو بشرتك عادية يبقى اغسلي وشك بأي غسول للوجه بيكون في الصيدلية، وده مش زي الشامبو ولكن بيكون شوية زي الجيل، ودي حاجة مخصوصة للوجه.. والغسول ده فيه منه ماركات غالية شوية، بس ممكن فيه حاجات أرخص بس خدي بالك إنه مايكونش فيها "زيوت" خالص.
شاهد الفيديو

ازاي تهتمي بشنطة مكياجك

فيه ناس كثير مش بتهتم بشنطة المكياج الموجودة عندها في البيت وبتلاقي إن المكياج كله على بعضه مش مرتب والأقلام مش مبرية، مش عارفة إيه اللي مدة صلاحيته انتهت وإيه اللي لسه...



علشان كده بانصح أي بنت إنها تروّق شنطة المكياج بتاعتها كلها على بعضها مرة كل أسبوع وهي بتروّقها تشوف إيه هي الحاجات اللي خلصت علشان تشتريها وبلاش إنك كل ما تنزلي وتلاقي مكياج عاجبك تجيبيه وإنتِ مش محتاجة له لأن زي ما إنتِ عارفة إن المكياج ده له مدة صلاحية معينة لو انتهت وإنت مش عارفة واستخدمتيه ممكن إنه يعرضك إلى أضرار إنتِ في غنى عنها...



وياريت كل بنت وهي بتروّق شنطة المكياج بتاعتها تجيب ورقة وقلم وتكتب الحاجات اللي هي محتاجة لها وتشوف الحاجات الموجودة في الشنطة أخبارها إيه زي الماسكرا مثلا، افتحيها وشمي ريحتها لو لقيتي ريحتها مش حلوة لازم ترميها فوراً، وماتستنيش عليها خالص لأنك لو استنيتي عليها واستخدمتيها ممكن تبوظ لك رموشك وممكن توقعها وممكن تتعب لك عينك.

أنواع الفرش اللي بتحتاجي ليها
لازم تكوني عارفة إنك محتاجة دايما في شنطة مكياجك للحاجات دي.. فرشة "الآي شادو"، وفرشة "الحواجب" وفرشة "الروجاجو" والـ3 فرش دول أساسيين..

غير طبعاً فرش تانية للتوزيع وفرش للأبيض اللي تحت الحواجب وفيه فرش تانية لتصغير حجم الخد شوية.

بالإضافة إلى السفنجة والبدارة، لازم السفنجة لـ(كريم الأساس) والبدارة للبودرة.. دول أول حاجة أس

إيه رأيك في البنات اللي بتحط الميك أب في الثلاجة؟

عادي مافيش مشكلة بس ده في فترة الصيف وده فعلاً بيحفظها وفي الشتاء عادي ممكن ماتحطهاش..

ومن الحاجات اللي ممكن تحفظ في الثلاجة زي "الماسكرا" و"أقلام الكحل"و "أقلام الحواجب" علشان ماتبقاش طرية قوي على الحواجب وممكن الرموش برضه تحفظ في الثلاجة..

اعملي جدول لتنظيف بشرتك

ممكن تعملي جدول وتروحي عند الكوافيرة مرة كل شهر، وده على الأقل، تعملي تنظيف للبشرة، تعملي تشقير لشعر الوجه وماتحاوليش تعملي فتلة كثير لأنها بتعمل تجاعيد للوجه.

ازاي تستخدمي المكياج علشان تداري عيوب الوجه

مافيش بشرة مافيش فيها عيوب بس احنا لازم نعرف الأول إيه هي العيوب اللي عندنا وبعد كده نعرف ازاي نستخدم الميك أب علشان نداري العيوب دي يعني مثلا بصي لنفسك في المرايا وشوفي طبيعة وشك إيه..

يعني مثلا:
• لو عينك صغيرة..
يبقى إنتِ المفروض تحطي لها أقلام فاتحة داخل العين يعني قلم liner أبيض- فضي- أزرق كل ده بيوسع العين شوية.

• لو عينك واسعة..
يبقى لازم قلم "أسود" أو "أخضر غامق" أو "كحلي" ودي ألوان حلوة قوي للعيون الواسعة وتبين جمالها.

كمان لو عندك عيب وإنتِ محجبة ممكن إنك تداريه بالحجاب فمثلاً بنداري منطقة الذقن بالحجاب، لو مش هنداريه يبقى بالميك أب بنغمقه شوية، يعني بنغمق منطقة الخد لأن فيه وش بيبقى مثلث لتحت فالمثلث لتحت نربط له رابطة إما إسبانش أو نربطها للوراء وبالميك أب نغمق المنطقة دي.

والميك أب والألوان تحت العين، فيه أزرق لون التركواز فاتح وقلم جوه العين لونه كحلي لأن الكحلي جوه العين حلو قوي ونازل موضة، لازم لو عملتِ الألوان دي تبقى كلها مرتبطة مع بعض مع الآي شادو.. كترنا شوية الآي شادو من الجانب.

لو إنتِ عينيك صغيرة شوية فالرسمة دي تنفع عليها قوي، وممكن تحطي رموش لو إنت رايحة فرح أو رايحة مناسبة كبيرة زي قراءة فاتحتك أو خطوبتك، يعني حاجة ليكِ أنتِ.

وعلى فكرة الألوان الموضة السنة دي هي "الذهبي" و"الأخضر" و"الأزرق" و"الموف الغامق" بتخلطي كل الألوان دي مع بعض بالميك أب يبقى ألوانها حلو قوي...

كمان من المهم جدا إننا نهتم بالحواجب لأنك لو مش مهتمة برسمة الحواجب فده هيؤثر قوي في شكلك وإنتِ بتتكلمي مع الناس، يعني مثلاً فيه حواجب بتكون طويلة قوي زيادة عن اللزوم فدي بتدي نظرة حزن ودي ناس كثير مايعرفوهاش قوي بس لو إنتِ فعلا ركزتِ فيها هتلاقي إن نظرة العين فعلا فيها حزن وخدي بالك إن الحاجب آخره ماينزلش على تخين، وإنما ينزل على رفيع شوية ويبقى تخين من الأمام.

ممكن نتكلم على رسمة الأنف لو احنا مثلاً عايزين نصغر الأنف شوية وهي طويلة شوية نغمق من المنطقة اللي تحت أو العظمة نفسها.

وإيه نصيحة "نانيس" لأي بنت؟

بننصح أي بنت إنها تكتشف مناطق الجمال الموجودة في وشها لأن لو إنتِ واثقة من نفسك وعندك إمكانيات بسيطة هتكوني جميلة وعلى ما أعتقد إن البنت لو ماعندهاش إمكانيات لازم تهتم بنفسها وبنظافتها جداً وبالحاجات البسيطة اللي تداري العيوب بتاعة وشها وفي نفس الوقت تخليها أجمل بنت في العالم، وفيه نقطة مهمة قوي إن مش مهم الحاجة تكون غالية، ومش مهم صرف فلوس كثير على الميك أب، ممكن حاجات قليلة تؤدي الغرض وده لأن المكياج فيه ماركات غالية قوي وممكن ناس كثير ماتعرفش تجيبها وماتعرفش تستعملها فتبقى جابتها وركنتها على جنب..

علشان كده أنا باعتبر إن المكياج الغالي بيكون مخصوص للمحترفين أكثر يعني، لو رحتِ لحد بيعمل ميك أب لازم تشوفي الأدوات اللي هو بيستعملها لو مش غالية مانصحكيش بيه.