نصائح منزلية..لتنظيف المنزل

لو عايزة زجاج الشبابيك والبلكونات يلمع يبقى كل اللي عليكي إنك بعد ما تشيلي التراب من على الزجاج تجيبي قطعة قماش قطنية مبللة بالمية الباردة والصابون السائل وتمسحي بها الزجاج، وبعد كده تجيبي قطعة قماش تانية مبللة بالمية الباردة وتمسحي بها الزجاج، ولو حسيتي إن الزجاج مش بيلمع يبقى ضيفي إلى قطعة القماش دي ملعقة خل أو رشي الزجاج بملمع الزجاج، في النهاية استخدمي ورق الجرائد علشان تنشفي الزجاج من أي آثار للمية...
وخدي بالك من إنك تنظفي الزجاج الداخلي بشكل رأسي والزجاج الخارجي بشكل أفقي.
هاتي فرشة وابدأي في إزالة أي آثار للتراب من على الأبواب ... وبعد كده هاتي جردل وحطي فيه مية وملعقة كبيرة صابون وهاتي ليفة أطباق تكون جديدة وخليها لتنظيف الأبواب وابدئي في مسح الأبواب بها وبعد كده هاتي قطعة قماش قطنية مبللة بالمية وامسحي الباب بها وبعد كده امسحي الباب بقطعة قماش ناشفة وده علشان تتأكدي من إن الباب نشف تماما من أى آثار للمية.
هتجيبي فرشة علشان تشيلي بها أى تراب موجود على الجدران ولو لاقيتي أي بقعة على الجدران يبقى اكتفي فقط بإنك تمسحي مكان البقعة دي بنفس الطريقة اللي مسحتِي بها الأبواب.
لو عايزة تتخلصي من أي آثار للبقع اللي بتكون موجودة على البلاط أو السيراميك يبقى هاتي فرشاة خشنة وبليها بالكلور والمية وادعكي بها البقع دي أكتر من مرة كويس وبعد كده امسحيها بالمية المضاف إليها صابون سائل وهتشوفي الفرق بنفسك.
من ضمن المشاكل اللي ممكن تقابلك مشكلة انطفاء لمعان الخلاطات الإستانلستيل وفي الحالة دي يبقى هاتي ليفة خشنة أو قطعة قماش صوف وحطيها في صابون أو أي ملمع للحمامات وابدئي في دعك الخلاطات بها وبعد كده اغسلي الخلاطات كويس بالمية.. لو الطريقة ماجابتش نتيجة ممكن إنك تمسحيها بقطعة قماش مغموسة في خل أو زيت طعام وبعد كده تغسليها بالمية والصابون.
وبالنسبة لتنظيف البانيو والأحواض نفس اللي عملتيه مع الخلاطات هتعمليه مع البانيو والأحواض وعلى فكرة الطريقة دي بتخليهم يلمعوا وبتنظفهم كويس جدا..
بالنسبة لتنظيف المرحاض يبقى يا ريت إنك تحطي في المرحاض ¼ كوب (كلوروكس) وتسيبيه لمدة ساعة وبعد كده تجيبي الفرشاة الخاصة به وتدعكيه بها كويس وبعد كده اشطفيه كويس بالمية ده للجزء اللي جوه وبالنسبة للجزء الخارجي نظفيه بنفس الطريقة اللي نظفتي بها البانيو.
لو عايزة النجف يلمع كأنك لسه شرياه يبقى هاتي قطعة قماش وبليها بالمية الدافية المضاف إليها معلقة خل وامسحي بها النجف.
لكن لو عايزة تلمعي قطع الكريستال الصغيرة يبقى ممكن إنك تنظفيها من حين لآخر بالكحل المستخدم لتنظيف الجروح.
لو عندك بقع صعبة في قماش الستائر أو المفارش القطن اللي عندك ومش عايزة تتطلع يبقى ضيفي معلقة من "النشادر" إلى المية اللي هتغسلي بها الستائر أو المفارش وعلى فكرة "النشادر" مش بس هتطلع لك البقع اللي فيها لأ دي كمان هتحمي المفارش القطن اللي عندك من الكرمشة ..

واوعي تعصري الستائر أو الأقطان اللي بتغسليها لأن ده بيخليها تتكرمش زيادة على اللزم وبيأثر على نسيجها.
لو كانت عندك رخامة المطبخ لونها أبيض وحاسة إنه بدأ يتغير ويميل إلى الاصفرار يبقى كل اللي عليكي إنك تدعكيها بعصير الليمون مع إضافة شوية ملح ناعم إليه وبعد كده امسحيها بقطعة قماش مبللة بالمية.
ساعات كتير وأنت بتحطي ماكياج بيقع منك على السجاد وعلشان تتخلصي من البقع اللي زي دي يبقى رشي البقعة دي بملمع الزجاج "هتلاقيه في السوبر ماركت" وبعد كده هاتي فرشاة الموكيت أو السجاد وضيفي إليها مية وصابون وادعكي بها البقع دي كويس وبعد كده نشفيها بفوطة صغيرة ناشفة.
ابقي استخدمي "شمع النحل"، وهي مادة متوفرة ‏بشكل سائل خاص بالمفروشات وامسحي بها أي حاجة جلد عندك، وبعد كده امسحي الجلد بفوطة ناعمة جافة وعلى فكرة المادة دي بتنظف وبتحمي الجلد من التشقاقات.
لو عايزة تلمعي أي حاجة زجاج عندك في البيت يبقى ادعكي الزجاج بفوطة مغموسة بعصير ليمون وبعد كده نشفيها بمنديل ورق وبعد كده امسحيها بورق جرائد مبلل ..
ولو عايزة تتخلصي من آثار أي خدوش على الزجاج يبقى ادعكي مكان الخدوش دي بمعجون الأسنان وهتشوفي النتيجة بنفسك.

وفي النهاية أحب أقول لك إن اهتمامك بنظافة البيت أول بأول هيخليكي في غنى عن كل المشاكل دي..

ولو عايزة ريحة بيتك تبقى حلوة على طول ممكن إنك تغمسي قطعة قطن بأي زيت عطري وتحطيها داخل المكنسة الكهربائية وبكده كل مرة لما تيجي تشغلي المكنسة هتلاقي إن المكنسة بتطلع ريحة حلوة والريحة دي هتنتشر في البيت كله...